الجوكر خواكين يجذب الناس !

السلام عليكم ورحمة الله وبركاته

انهاردة هنتكلم عن فيلم الجوكر ونزول " التريلر " النهائي ورسميا ناس كتير تصاب بالجنان بسبب التريلر ديه بل فيه ناس اعلنت ان خلاص خواكين هيحصد جائزة الاوسكار عن جدارة واستحقاق .. خلونا نتكلم شوية عن الفيلم .. الفيلم اولا بيحكي شخص يدعي ارثر فليك واللي بيجسده الممثل الكبير خواكين فينيكس .. ارثر يعتبر عنده اضطراب نفسي وبيتظلم من المجتمع ومن الناس لحد ما هذا الشخص يقرر انه يبقي من طيب وغلبان عاوز بس يرسم الابتسامة علي وشوش الناس يتحول الي شرير .. شخصية الجوكر جسدها اساطير زي هيث ليدجر وزي جاك نيكلسون وبالاداء الصوتي مارك هاميل دول اكتر تلاتة الكل متفق عليهم انهم احسن وافضل ناس قاموا باداء شخصية الجوكر بجانب ان فيه ممثل "اندرريتد" ناس كتير ماتكلمتش عنه اسمه كاميرون موناغان وادي شخصية الجوكر في مسلسل اسمه جوثام بس ناس كتير مااتكلمتش عنه بس فعلا هو ممثل هايل وعمل الدور حلو جدا .. وفيه جاريد ليتو والصراحة مادخلش دماغي خالص شخصية الجوكر اللي عملها ليتو هو كان عاوز يغير من الشخصية بس الناس مااستجبتش معاه لان الجوكر له شكل خالص واسلوب خالص فالناس مااستجابتش للتغير اللي حصل في شخصية الجوكر اللي عمله جاريد ليتو .. الجوكر في السينما حاجه كبيرة جدا ويعتبر من الشخصيات الصعبة جدا نتيجة شخصية الجوكر نفسها تعاني من امراض نفسية ودا اللي اتكلم عنه جاك نيكلسون انه فعلا كان تعبان جدا من الدور دا لانه دور صعب .. دا غير طبعا هيث ليدجر اللي عمل الدور اللي اخد بسببه اول واخر جائزة اوسكار عن افضل ممثل وللاسف انتحر بسبب اللي حصله من الشخصية ديه لان هيث ليدجر معروف عنه انه بيتأثر جامد بأي شخصية بيعملها وبيحضر ليها كويس جدا بيبعد عن اهله تماما وبيركز في الشخصية فما بالك بشخصية زي الجوكر والاغرب ان هيث ليدجر لو بصيت علي افلامه هتلاقي ان اغلب افلامه تافهه يعني لا يمكن تقول ان الراجل دا يقدر يعمل شخصية اسطورية زي الجوكر وكان ساعتها جاك نيكلسون كان افضل واحد عمل شخصية الجوكر وماحدش كان يقدر ينافسه يعتبر هو التوب ساعتها ولكن هيث ليدجر كسر الحاجز دا ويعتبر انه احسن واحد عمل شخصية الجوكر .. طيب ايه سر اهتمام الناس بفيلم زي الجوكر بالشكل دا ؟ .. اولا لان الناس عاوزه تشوف هل خواكين هيقدر يعدي هيث ليدجر ؟ وانا مش معاهم الصراحة لان دا دور ودا دور .. اه دا دور ودا دور بمعني ان جوكر خواكين انت عايش حياته عايش قصته بتشوف التفاصيل اللي خلت الراجل دا يبقي جوكر شخصية طيبة غلبانه تحولت فجأة لمجنون محب للفوضي .. انما جوكر ليدجر شخصية تانية خالص دا الدور اللي بعد التحول متعرفش تفاصيل حياته اوي ماتعرفش ايه سر الميكاب يبقي بالشكل دا متعرفش سر انه بقي شرير يعني يعتبر نزلك بالبراشوت متعرفش جه منين هو نزل فجأة كدا ومتعرفش مين دا ولا كان عايش ازاي .. خواكين قدام تحدي صعب .. صعب جدا بس هو قدها وقدود لان خواكين من الممثل اللي بالنسبالي اللي مولود ممثل يعني معرفش الراجل دا لو ماكنش ممثل كان هيعمل ايه خواكين فينيكس كان عمل شخصية مريض نفسي في فيلم The Master وبالمناسبة دا لينك مشهد من الفيلم اللي مايعرفش خواكين يشوف لمحة بسيطة عنه ويحاول يتخيل هو هيعمل الجوكر ازاي بعد مايتفرج علي المشهد دا 

https://youtu.be/otLDuy0ToFg

.. خواكين قدر انه يخلي الناس تحب الجوكر الجديد دا وتبدأ تحطه في مقارنات مع هيث ليدجر مع اني شايف مالهاش لازمة بس دا كان عامل مهم جدا للفيلم ليه بقا .. اولا لان ناس كتير متعاطفه مع هيث ليدجر جدا واي حد بيفكر يعمل جوكر فالناس تقوله علطول هيث ليدجر احسن منك علطول مش يدوا فرصة خواكين من اول ما نزل الاعلان والناس فعلا بدأت تحبه وتتقبله وسر تعاطف الناس مع ليدجر انه انتحر علي حسب الكلام انه انتحر بسبب شخصية الجوكر وعمقها النفساني مما ادي الي اصابته بالاكتئاب فبالتالي الشخصية ديه ليها جانب عاطفي كبير عند الناس فأنك من اول لحظة تحاول بس تقولهم ان هيث ليدجر مامتش وان فيه ناس تقدر تعمل جوكر حلو جدا والناس تتقبل ان فيه ممثل يعمل جوكر والناس تحبه كمان دي لوحدها انجاز كبير ونجاح انه صناع الفيلم عرفوا ازاي يحببوا الناس في جوكر خواكين قبل ما الفيلم ينزل في السينمات فدا في حد ذاته انجاز .. انا ممكن اكون مكبر الحكاية بس ماحدش شاف اللي حصل لجاريد ليتو وكمية الانتقادات علي الراجل لما غير في شكل الجوكر وعاوز يعملها نيولوك وحتي فيه ناس شبهته بمايلي سايرس علشان شكله وقصته شعره من وجهة نظري ماتعبش في الشخصية زي هيث ليدجر ماعمل وزي خواكين برضه ما باين جدا في التريلر انه فعلا الراجل مش جاي يهزر مش جاي يعمل فيلم يمشي لا جاي فعلا يسرق قلوب الناس اللي متعلقه بهيث  ليدجر سنين طويلة ومش شايفين غيره يقدر يعمل شخصية الجوكر .. وانا هنا بوضح مش بقارن بين خواكين بهيث ليدجر انا بحاول اوضح الناس مدي تعصبها لهيث ليدجر ومافيش غيره يقدر يعمل الشخصية ديه فانت تجذب الناس للجوكر الجديد دا   في حد ذاته انجاز كبير انك تحاول تخلي الناس تتقبل ان فيه حد يقدر يعمل شخصية الجوكر

الفيلم هينزل يوم اربعة اكتوبر ان شاء الله ومنتظره  بشغف كبير

شكرا لحضراتكم 

تحياتي

خالد