السلام عليكم ورحمة الله وبركاته
في البداية كدا احب اوضح ان المقال دا هيكون عبارة عن رأي شخصي جايز اكون صح وجايز اكون غلط فمش نهاية العالم
بعض الناس بتصنف محمد رمضان انه اضل ممثل في مصر وشايفين فيه انه احمد زكي القادم
مع احتزامي الشديد للناس اللي بتفكر كدا او اللي بتقول كدا فاانا اسف انتم مااتفرجتوش علي احمد زكي
احمد زكي دا ياجماعة ايقونة في تاريخ السينما المصرية بأمانة الراجل دا ماقدمتش شوية ادوار وبس دا ادي درس لكل واحد عاوز يمثل ازاي بيتقمص كل شخصية وازاي بيقنعك انه الشخصية اللي في الفيلم مش احمد زكي شخصية زي السادات وعبدالحليم وعبد الناصر الشخصيات الاسطورية ديه ازاي الراجل دا اقنع الجماهير انه عبد الناصر انه حليم انه السادات من غير مايخلي الناس تقول دا احمد زكي .. ممكن انت مافهمتنيش في النقطة ديه هفهمك .. محمد رمضان لما يعمل شخصية فاانا بالتالي بعرف انه دا محمد رمضان بمعني ادق اني مش بسرح مع الشخصية ديه اني اصدق انه فلان مش انه محمد رمضان ودا فيه مشكلة عند محمد رمضان انه مش قادر يوصلك كمشاهد انه بيجسد الشخصية يلبس الشخصية مع احترامي الشخصية مش انك تقلد الشخصية انك تقنع اللي قدامك بأنك حد تاني ودا اللي كان بيعمله احمد زكي رحمه الله في اي شخصية بيدخلها مش بيخليك تقول دا احمد زكي لا لو عامل دور مدمن هتقتنع انه مدمن لو عامل دور ظابط هتقتنع انه ظابط ودا الفن دي السينما ياجماعة خلونا نطلع برا السينما المصرية شوية .. بصوا علي هيث ليدجر وازاي عمل شخصية الجوكر وازاي اقنعك انه مش هيث ليدجر خلاك تقول دا الجوكر نساك تماما ان فيه ممثل عامل الدور دا وخلاك تعيش مع الشخصية ديه كأنها موجودة علي ارض الواقع ازاي غير نبرة صوته ازاي اهتم بالملابس ازاي اهتم بتفاصيل الشخصية الحزن والكآبة ازاي اهتم بنبرة صوته بضحكته حاجات كتير اهتم بيها علشان يخلي الناس تسرح معاه وينسيهم ان فيه ممثل لا الشخصية ديه موجودة معاك .. ودا اللي كان بيعمله احمد زكي رحمه الله احمد زكي زوجة رجل مهم ازاي كان راجل متسلط اناني ظالم مستغل سلطته ونفوذه علشان يرعب ويرهب الناس وماحدش يقدر يقوله كلمه .. تعالي في شادر السمك ازاي خلاك في بداية الفيلم تتعاطف معاه ششخصية جدعة بنت بلد صعيدي دمه حامي مارضاش يسيب نبيلة عبيد تتهان من قبل معلمين شادر السمك ووقف ضدهم ولما كترت الفلوس والنفوذ تحول الي شخص تاني خالص شخص ظالم ومفتري في نفس الفيلم ونفس الدور بس التحول خلاك تتعاطف معاه في الاول وبعدين تتنرفز منه وتتعصب وتكرهه في نفس الفيلم .. شوف السادات ازاي خلاك من اول الفيلم لاخره مقتنع ان دا السادات مش احمد زكي ..ازاي في البيه البواب اقنعك بأنه بواب واللي عنده بواب شغال في عمارته اللي عمله احمد زكي في الفيلم هو هو اللي بيحصل من ناس شغاله نفس المهنة ديه بالظبط بشوفها في كذا حتة وكذا عمارة مش بقول كلهم وحشين حرام بس فيه ناس كدا فعلا فيه بوابين كدا فعلا ومش قصدي اهانة والله العظيم الشغل مش عيب طالما شريف .. لا مدرسة احمد زكي دا مدرسة لن تتكرر السينما لحد انهاردة مش قادره تعوض غيابه مع احترامي للناس الموجودة في الساحة بس مافيش حد زي احمد زكي هيجيي مهما حققت من نجاحات في الافلام والاغاني بس مش هتوصل لربع مستوي احمد زكي احمد زكي بعيد اوي بل انا اصنفه احسن من عادل امام نفسه تقمص احمد زكي لاي شخصية تغلب عادل امام واي ممثل الصراحة ودا رأيي انا اسف ممكن يزعل ناس كتير بس فعلا الراجل دا قدم حاجات صعبة جدا علي اي ممثل يعملها او يجازف انه يعملها ياجماعة دا عمل 3 شخصيات اثروا في المجتمع حد عمل كدا ؟ ومش قدمهم وبس دا تقمصهم كمان .. لا مدرسة محمد رمضان ماوصلش لسه للمستوي دا انا اسف مهما حقق من نجاحات بس فعلا رمضان بعيد بعيد اوي عن مستوي احمد زكي رحمه الله
وفي النهاية دا مجرد رأي شخصي بتمني ماحدش يزعل مني
تحياتي
Comments
Post a Comment